七年前，黃修平執導、談街舞的《狂舞派》，燃起無數年輕人「追夢嗰團火」，當時剛出道的Rapper Heyo（霍嘉豪）坦言本跟電影圈沾不上邊，多得導演和團隊信任，予初嚐演出滋味。誰料當眾人躊躇滿志，香港卻天翻地覆，Heyo有份擔綱主角的續集《狂舞派3》，能否如期在農曆年檔上畫，還有未來種種，「好似我首〈未必、Maybe、未知〉，人生永遠難測，但一切進行中。環境愈危險不穩，我哋愈要盡試盡做，幫自己企好。」

text．Ko Cheung

photo．Bowy Chan

wardrobe．Smiley（Hat）、溥儀眼鏡（Glasses）、Empty Of（Hoodie）、Vans（Shoes）

影壇寒冬的一點光
2020年是香港電影「寒冬」之年。限聚令、封閉表演場所和戲院等防疫措拖，使許多拍攝、放映及宣傳停擺及取消，當一度受社會環境影響後期進度的《狂舞派3》，最終趕上金馬獎報名限期並成為影展閉幕片，讓業界為之振奮。

尤其Heyo憑本片入圍最佳新演員和最佳原創電影歌曲（全片共六項提名），跟另一位演員阿弗率領眾舞者活力地登上頒獎禮殿堂，齊齊高舉拳頭合唱出主題曲〈歡迎嚟到呢座城市〉，不少香港人還忍不住「隔住個海、隔住個Mon」聽出眼淚。皆因歌中一句又一句「都市下沉中 / 制度穿哂窿 / 響起警鐘 / 我哋繼續街頭播 / 係時候解封 / 捍衛自由 / 係時候發功」，不僅道出戲中人處境，也道盡當刻的香港現實。

機會是自己創造的
縱使Heyo沒奪獎而回，可是想起金馬鼓勵、觀眾支持、夥伴同行，深覺感動和圓滿，「自問演戲經驗唔多，導演敢畀我試、大會願意提名，反映大家期待同歡迎我加入電影大家庭，真係好開心。」感觸，或因他長年專注的Hip Hop及Rap領域，在香港向來被大眾視作次文化或小眾「玩意」。憶想發展之初，他不諱言親朋同學等圈子「同創作大纜扯唔埋」，如何起步曾求問無門，亦遇過難找素材、孤軍作戰或遭冷言冷語的日子，難免有過迷惑時。

「但社會無教呢種生活方式？我哋可以搵方法逐步認識。」Heyo說，「去唔到外國學藝？咪同朋友喺本地周圍睇表演、示範，再落街頭模仿。試過撞到MC仁表演，嗰時我後生『衰格』（笑）無直接發問，但會仔細觀察；每次寫好歌詞，就發畀唔同人，特別無聽開Hip Hop嘅朋友，意見愈唔同反而愈好；同MC仁熟咗，又跟佢去上海觀摩，見北京似東岸、成都好富饒，同南方Hip Hop風格好唔同，好似睇『三國』咁大開眼界，都未講蒙古同其他區嘅Hip Hop，各有千秋⋯⋯」

專注本業與責任
Heyo笑言見識外面世界，不再年少氣盛，「有次又撞到懷孕護士樂迷，佢話成日同老公播我啲歌做『胎教』，嘩！嚇到我（大笑）！由此諗起，我都受過前人啟發，例如聽〈V.3005〉認識同思考到人類歷史、Hip Hop文學意義等，開始諗多咗社會責任同影響。」探索中，他體會Hip Hop豐富又多層次，從Rap、DJ、街舞、塗鴉到Beatbox，各項目如金字塔般牽涉不同技術元素；Slang等運用又如小數民族，各有族群文化與特色。

「我明白各有口味同所長，與其否定或追逐其他人，不如專注本業，諗清楚自己每個關頭，想點抉擇、回饋、做人處世。細個遇到相反意見，或會心火盛同人嘈，但近十年，我仍然珍惜各方意見，但極少再同人爭拗，寧願爭取時間增進知識同經驗，多做實事推廣Hip Hop。」

讓我們合力圓夢
Heyo由衷說，「我唔敢話教人，只希望『補位』。我真心相信Rap可以『如詩』有文學美，廣東話入詞好精彩。眼見現時香港Hip Hop處於『桃駁李』階段，仍然在接種、孕育，果實未算成熟，亦較缺乏『文學性嘅Rap脈絡』，我就想主動去寫、去唱、去分享；後網絡時代，匿埋齋做創作唔全面，仲要識宣傳、推廣、管理，先可以擴充規模、調整結構，所以我樂意參與團隊合作，同工廈各界別朋友，記者、攝影、設計師等搞市集，又跨界拍戲，了解更多崗位與職能，學習溝通。」

「我仲有個心願，想出三本Hip Hop文化書，頭兩本介紹Rap技藝，第三本講Hip Hop同香港生活觀察，引導大眾認識Hip Hop亦多欣賞身邊事物⋯⋯依家爭搵出版社咋！」看Heyo積極地面對未知，讓人想到追夢除了「去到幾盡」，還需要智慧、行動和耐性，方可讓意念於現實中萌芽、紮根及
成長。 ■