奇怪地，用廣東話唱書面語寫嘅歌，就係要受保護嘅廣東歌，但用廣東話入詞就會被視為通俗，事隔多年，直至最近新歌〈越活越惹禍〉，Serrini 仍然鍾意用廣東話入詞：「其實有好多人嘗試當中，可能多咗人想食嘉美雞，就會有多啲本地味道出現。」

text．陳菁

photo．Bowy Chan

makeup and hair．Anise Ma

wardrobe．@mch.studio

用廣東話同純書面語寫詞，有咩分別？
口語係日常溝通好重要嘅一環，但當寫歌用口語好多人就覺得好低俗、好市井，唔夠美感。好多明星唔想有市井形象，想保持好中產，可以著名牌衫嘅形象，於是就唔會用咁多市井語言，因為市井語言某程度上代表草根，但我爸以前聽許冠傑啲歌都係用口語。我有嘗試做實驗，好認真嘅題材，配上好口語嘅詞會係點呢？其實都有啲哭笑不得，比如「有頭髮邊個想做癩痢」，但其實講點解你唔同我睇戲。其實我想控制吓書面式口語，或者口語式書面語，如果行文流暢地表達自己嘅思路，咁內容就係詩化嘅口語。其實廣東話填詞好煩，對我嚟講係打大佬嘅寫作練習，有好多音，要押韻，唔啱音就真係填唔到落去，如果唔係就會變咗宗教體裁。

咩係書面式口語同口語式書面語？
書面式廣東話係模糊咗語言之間嘅界線，即係唔好太原教旨。我好記得有個教授話有啲書面語唔啱文法，有句歌詞寫「方和向」，其實方和向係冇意思，應該係方向。但就係為咗押「向」字韻，中間就加個「和」字，其實係明白，只係要將啲字情境化。你控制到個語言就夠，唔一定要加幾多個百分比嘅書面語先係好。歌曲當中有好嘅中文，會啟發到人理解自己嘅情緒，無論你寫得好詩化或者夾雜粗口都可以做到，都可以達至美嘅境界。大家都想聽到親切嘅語言，如果你寫到有趣嘅作品，而大家都崇優，就會願意理解你做嘅事。

你咁多廣東話歌，係咪將香港人或者以廣東話為母語嘅人視為目標群眾？
都唔係，因為我啲歌喺冇人講廣東話嘅地方都會出現，有法國朋友話好鍾意我隻〈網絡安全隱患〉。我去北京、上海開live show，明明大家都聽唔明我講乜，但一唱歌大家又識唱，嗰個感覺好神奇，係超越語言嘅溝通。法國朋友可能欣賞個groove，但華文觀眾其實睇得明啲歌詞。我好多歌迷話因為想聽得明啲隱藏笑位或者深層次意象，所以想學廣東話。其實好似long-D拍拖咁，你溝咗個外國人，但對方唔肯學你嘅語言，某程度上會難受，係咪唔鍾意我屋企文化？而家鍾意一個歌手唔係單純鍾意佢啲歌，都會想知佢做啲咩，但我唔會因為想服務佢哋而拍片加十種字幕。我亦冇特別諗係咪香港優先，如果好種族地去諗，就會變咗我曾經參加過嘅party，我啲外國朋友搞咗個Hong Kong Night，全部啲嘢食都係格仔餅、魚蛋、蛋撻同埋叉燒，笑到我黐線。我個人唔一定要同城市一齊，亦唔一定要割裂，我係構成城市嘅一部分。

以前香港軟文化好發達，而家歌手唔使等派台先發布作品，多咗人留意非主流音樂人，算唔算係一種時勢造就？
我覺得係，地緣政治或者大市場係會吸引多啲觀眾，而家香港係冇咗以前嗰種既得利益者嘅姿態，大家要轉型都係受世界驅使。我成日都諗假如中原（Serrini對中國嘅稱呼）改革開放，我就可以努力令更多人鍾意我嘅歌，咁暫時作為唔係好pop嘅歌手，我只可以搵自己嘅朋友同空間。既然而家唔使等傳統媒體，你講自己嘢都簡單啲，但如果都會受機構控制，佢係要你收聲就要收聲，咁又要點應對呢？千祈唔好放棄討論，如果唔係我就要著紅色衫去幫手生仔。（源自《侍女的故事》）

假設有日廣東話唔可以再用，你會點？
呢樣嘢十年前喺廣州已經發生咗，有人會示威，慢慢地都變成不成氣候嘅反抗，都幾難過。但其實好難抵抗，小學有同學仔笑你講廣東話，老師話再講罰你十蚊，咁應該點做？似乎要學做千面人，又要保持真心。但我覺得只要一日人類肯繼續去保留，未來有信念就得。