黑到盡處最後有光，失聯的人亦可重聚——說的是「孿人之中最姣，姣人之中最孿」的朱豔強（Yim Yim／豔豔）！時光回到2013年，叱咤903 DJ 少爺占自創虛擬同志「朱豔強」，聲演「艾粒530劇場」的「攣豬豬」角色，深受自己人歡迎，推到豔豔登舞台演出《少爺占朱豔強口口笑之Super Me》及《少爺占朱豔強口口笑長長99》棟篤笑，但14年當豔豔風頭正盛時，卻神秘地人間蒸發，只得阿占知其去向。

闊別七年，今年豔豔突然現身網上，宣佈十月將假灣仔修頓場館舉行《朱豔強自己一條Show》，令自己人萬分興奮！消失的日子，他經歷甚麼變化？為何此時強勢歸來？且聽其親自分解。

Text by Ko Cheung
Photo by Bowy Chan
venue: Pier 1929 (ig: @Pier_1929)
makeup: Krisie Wong
hair: Johny Wu@Hair Corner CWB
wardrobe: 美華氏

七年後熱情歸來

「你想我講先，定豔強講先？」深知人人掛住豔豔，阿占甫開始就風度地禮讓「Yim Yim First」開腔，豔強亦盡展久違的風騷，「嚟嚟嚟，想知咩，隨便問！」好吧，那就單刀直入，俗語話「姣人守唔到寡」，何解偏偏表演慾旺盛又夠生鬼搞笑的他，當年竟然又會守到咁耐，「狠下心」暫別眾豔強粉，一走就走了七個年頭、走到無聲無息，捨得嗎？

「我都好記掛大家，但當年想靜一靜、諗一諗。」豔強直率表示，他並無忘記支持者的愛，只是作為一個「虛擬的幕前人」，經歷着故事中的情感歷煉，難免跟無數「真人」般，需要時間和空間思考人生。「嗰時網絡無咁流行，人同人之間嘅溝通真實啲，但呢幾年網絡盛行，好多朋友唔做全職，轉做KOL、YouTuber、Slasher發展理想；世界又變成Me Generation，個個用網絡表達意見，有人Like你時，又有人憎爆你，咩都有；甚至現實世界，經歷2019到2020社會加疫情衝擊，直情『而家都唔知一陣事』，有時會疑惑：究竟自己做緊乜？可以做到乜？幾時做啲乜？先叫適合⋯⋯哎吔，諗到頭爆！」

愛，就行動吧

雖則豔強和阿占都諗到頭痛，但亦因世道無常，他們決定「諗咁多不如試吓先」，一於在Facebook出文，看誰會回應。「無諗到，豔強出Post，秒收到幾百個留言，我平時啲Post只得十零個⋯⋯」阿占苦笑，豔強得戚，「多謝大家支持！更驚喜係，當我提議開《朱豔強自己一條Show》，Set個Private Group收DM，真係有成千人回覆。開頭有諗，網上㩒個掣有幾難？真係買飛先算。點知要求大家收表格後，印張Form出嚟、再寫支票、入信封、貼郵票，落街寄信去商台，程序勁多、勁轉折，吖，最後又收到近千封信，同網上差唔多！我真心好感動、好感動、好感動！原來，香港人齊心起嚟咁堅，又無忘記我，現實同網絡世界都唔係咁冷漠！」

豔強極感觸，卻沒泛淚。皆因流淚非他的作風，本着「與其喊出嚟不如笑出聲」的精神，他再次獨挑大樑，走入灣仔修頓場館做《朱豔強自己一條Show》回饋自己人的愛。「呢七年巨變太多，我諗每個人都想做啲嘢。好似我見奧運時，香港選手努力奮鬥，都被激勵，即使無佢哋咁叻，我都至少叫識令人笑，可以陪伴及安撫大家，略盡綿力都好。」於是豔強，「搵個細啲、親近啲嘅場館，同大家齊齊盡情放鬆、癲返晚，行開吓忘記呢個世界。」

世界變，創意轉

主題方面，豔強針對網絡新世代現象出發，「今次我會將事業、家庭同情路嘅跌宕、孤單，結合時下社交，傾吓『如何同現代人溝通』課題。首先，家陣世事太荒謬，唔可能咁早寫Talk騷內容，而家寫聽日都Out，要近開騷先落到手；但咁唔代表求其咗，反而更考心思，皆因觀眾要求高咗，社會都變天，要人齋坐齋聽嘅模式，唔再Work，我需要同大家多互動、多即興。內容上，試多咗新嘢，例如一早邀請最早Like班支持者參與主題曲MV拍攝、拍朱豔強選舉片，希望更多人參與同分享歡樂。至於演出舞台，又因應修頓球場的形態，設計到好似Catwalk騷嘅長形舞台，希望同大家親密啲High返晚。」

講起主題曲〈Boy Boy〉MV，是次豔強專程夥拍Jay Fung 及JNY一起製作， 此曲為馮允謙第一首正式為別人監製的音樂作品，錄音當日他笑稱比全場更緊張，而豔強亦特登為歌曲拍攝而排舞半個月，MV製作費更高達六位數字，非常隆重其事。「呢首歌我都寫得好認真。首歌本來想寫『今年是但求其開心』，但諗諗吓太艾粒（I Love You Boyz），於是後來轉了歌詞，即是現在的〈Boy Boy〉，借『健身室求婚／祝你在亂流下成真』、『I’m so high I’m so high 』講今朝有酒今朝醉嘅心情⋯⋯你知，七年前都諗唔到而家咁，更唔好講七年後⋯⋯可能七年後我都唔喺度喇。」

快樂時光特別快

有傳，今次將是豔強「最後一次表演」，真的嗎？「講唔埋，無人知。」豔強說。不再現身，是否在幽暗世道中逗人笑，愈來愈難？阿占代豔強答：「都唔完全係。2019年最艱難時，我（哋）有個訓練，就係經歷瘋狂嘅日頭，每晚11點做節目，點樣調整心態，喺聽眾辛苦時，唔好再講嚴肅嘢，嘗試盡力幫大家輕鬆兩粒鐘，再去面對下一個更癲嘅日子，原來都好緊要。那怕我哋無能力救世界，但作為娛樂者，如何亂世中保持專業，私下都釋放自己，令身心頂到落去，都緊要㗎。」

阿占感慨，「將來點都好，演出夜，希望豔強盡興發揮佢最癲喪、忽德嘅情感！」豔強調皮說，「係啦，我都希望呢次演出後，阿占唔好又收埋我咁耐，因為匿得愈耐愈難再走出嚟⋯⋯我都想陪大家一齊成長、一齊變老㗎！」

《朱豔強 自己一條Show》
主辦：商台製作主辦、叱咤903寡人今晚好得閒、寰亞音樂全力支持
日期：10月 22至23日
時間：8:15pm
地點：灣仔修頓場館